Tea Buffet @ Cafe (Hyatt)

當朋友們都兒女成群、有家有室時，就會少咗晚飯聚會，相對地就會轉咗 lunch time 或 tea time 時間出嚟聚聚。Tea time 的話，多數選擇都係選擇 tea buffet 或 high tea。 其實香港有供應 tea buffet 嘅酒店唔多，而要好食同多選擇的話更少之有少。

Hyatt Cafe 係少數之中好食，又多食物選擇嘅其中之一。呢日同大少奶慶祝生日，就嚟咗呢樹食 tea buffet。我食 buffet 通常都熱食只係食一個 cycle，冷盤、湯就會多過一次，但甜品就有機會會 skip。但今次好想食一個 full cycle，所以每款食物只可以食一次，唔可以多，如果唔係就食唔落喇！

呢到嘅冷盤有我喜愛食嘅海鮮，海鮮嘅種類亦唔少，而且亦都好新鮮。

佢有多款 sandwich，但我就只係揀咗呢款碎蛋沙律。原因好簡單，我鍾意囉！

這件辣肉腸 pizza 又估唔到係咁好食，仲感覺係越食越辣添呀！

有辣椒天婦羅，但可惜這個辣椒不太辣！

湯永遠係我至愛，女人始終都係適合飲多啲湯水

佢嘅粥就非常綿，但可惜今次無哂油炸鬼同脆脆送粥，有點美中不足

我無食這件蛋糕，只係借大少奶嘅嚟影張相，這隻蝴蝶實太美

三件蛋糕裡面，最愛食就係栗子蛋糕，好香嘅栗子味，但又唔會太甜。

打邊邊 @ 壹碗麵

凍喇！凍喇！終於進入冬天喇！今日最低氣溫只得12度，明天最低得10度咋，新界地區仲要低多兩度！咁凍嘅日子食咩好呢？首選一定係圍住個爐打邊邊啦！適逢今日係 Green Monday，就嚟一個 Green Monday 邊爐鍋啦！

最近壹碗麵就推出咗一個壹鍋全家福，裡面嘅材料係全素食。千祈唔好睇少呢個素食鍋，雖然所有嘅材料都係菜類，但材料豐富美味，無番三、四個人都食唔哂！這些材料加入湯鍋後，個湯底變得非常鮮甜，飲多兩碗仲可以清下熱氣添！

除咗這個壹鍋全家福外，仲可以選擇這個醉雞鍋。隻雞食落仍然好嫩滑，一啲都唔會鞋，個湯簡直就係暖笠笠。

Breakfast @ Cafe Ceres

通常星期六、日都會同屋企一齊去食早餐，而多數亦都會係屋企附近嘅茶記。但呢一日突然心血來潮唔想食茶記，想食一個西式早餐。婉拒咗同屋企人一齊食早餐，跟住就搜索一下屋企附近有咩 cafe，終於搵到九龍城呢間 cafe 有我想食嘅早餐。

點解會揀呢間 cafe，因為佢除咗 All Day Breakfast 有我喜愛嘅茄汁豆外，另一款早餐 Ham & Cheese Croissant 都有茄汁豆。下午仲要去食 tea buffet，所以早餐一定唔可以食得太豐富。

我去到 cafe 原來剛好已經過咗早餐時間，但慶幸店員只係望一望個鐘，仍然肯幫我 order 我嘅 Ham & Cheese Croissant breakfast，飲品就要咗 Latte。

佢嘅 Croissant 係用咗飛碟嘅製法，所以出嚟嘅 Croissant 已經壓扁咗，但這樣有一個好處，就係 ham & cheese 可以完全溶合埋一齊，個味道就增加好味。雖然個牛角飽壓扁咗，但仍然可以食到佢嘅酥脆味道。

Latte 香濃順滑，咖啡上嘅兔仔拉花，望落去令人感覺好開心，令我好有衝動想去學拉花。

聖誕餐 @ Amore Italian Restaurant

雖然香港係中國嘅一部份，但香港人一直都受著西方文化嘅影響，所有嘅西方節日都會慶祝一番。還記得細個嘅時候，復活節契姐會買一座好大嘅復活節朱古力蛋送俾我同阿哥。萬聖節小朋友會去每家每戶去攞糖，大人就去扮鬼扮馬飲酒慶祝一番。到咗聖誕節，當然唔少得要應下節，食個聖誕大餐。

適逢我嘅生日係响聖誕期間，一般都會聖誕生日一齊慶祝，所以總有機會可以食聖誕大餐。今年還未決定到去邊到慶祝聖誕，大家又安排好未呢？今晚就先食為快，去咗 Amore 食聖誕大餐！

未正式開餐前，先嚟個麵包籃。蕃茄沙沙配麵包，給大家開開胃！

開心果乳酪火雞卷伴鵝肝 ~~ 鵝肝對我嚟講，一定無得輸，難得鵝肝微脆嘅外表亦煎得恰到好處。但意想不到嘅係，乾脆嘅開心果配雞卷亦非常美味。

牛肝菌湯 ~~ 好鐘意這個湯，好香嘅牛肝菌，非常 creamy

烤澳洲羊架配香草野菌汁 ~~ 羊架煎得剛好，邊位煎得香脆，肉質嫩滑。

以上嘅都只係 Christmas Menu 內部份嘅菜式，當然一定唔少得聖誕甜品啦！如果大家還未決定好聖誕節去邊慶祝，這裡絕對值得考慮哦！

煲仔飯 @ 天后尚囍

踏入秋冬，又係食煲仔飯嘅時候。絕大部份煲仔飯都係用煤氣爐煮，炭爐煲仔飯唔係處處可以食到。呢日食友相約一齊去天后食炭爐煲仔飯，剛好當日天氣突然轉涼，簡直係時間剛剛好。

臘味煲仔飯 ~~ 臘肉唔會太硬，如果條臘腸可以原條上，整條扯住食會更好。而個飯可以再乾身少少就好喇！

白鱔田雞煲仔飯 ~~ 自細就好鍾意食田雞煲仔飯，每次見到有田雞煲仔飯都一定會叫。今次仲加埋白鱔，過往唔太多食白鱔。今次嘅白鱔煮得夠乾身，食過又過得幾好食喎！下次過食煲仔飯又可以多個選擇喇！

老香江茶居

西貢係我一個唔多踏足嘅地方，入嚟嘅次數可能唔多過五次。還記得第一次踏足呢個地方，係因為佢响呢樹嘅愛護動物協會工作而入住西貢，而我就回港旅行而入嚟探佢。對上一次入嚟就好似係已經好幾年前，同舊同事入嚟 BBQ。

今次再入嚟，有少少桃花依舊，人面全非嘅感覺。當日嘅好好朋友，今日可能已經變咗係一般嘅朋友；當日嘅佢，變咗做今日嘅佢。當日仍然係黃毛丫頭嘅我，今日已經變咗有好多心事嘅我。人大咗，自然諗多咗；人老咗，自然讓步咗！

雖然好多嘢唔同咗，但慶幸我身邊仍然有一班好朋友陪伴住我，呢日就攞咗半日假同兩個好朋友入嚟西貢覓美食。

老香江茶居絕對唔係一間古老，而係一間充滿優雅、給人寧靜感覺嘅茶居。呢間茶居除咗環境不錯外，佢嘅食物亦係值得一試。

三個人，但叫嘅食物絕對唔止三份，我相信五至六都應該可以夠食。

原條免切叉燒飯 ~~ 但因為我哋係 share 食，所以要求餐廳幫我哋斬件上。叉燒嘅肉質夠腍，味道濃郁。如果原條上應該會更有咬口

三浸玫瑰豉油雞伴麵配清湯 ~~ 這個麵令我回味番細個响街邊買炒麵嘅味道，配上嫩滑嘅豉油雞，多咗一分貴氣

魚湯海鮮大會飯 ~~ 這個大會飯真係材料十足，每樣海鮮都係非常新鮮，鮮甜嘅海鮮湯底，令湯飯變得更美味

酥炸流心蛋配秘制醬汁 ~~ 這個酥炸流心蛋就像媽咪煎荷包蛋，但佢經炸過後，蛋邊比普通荷包蛋更脆

老香江下午茶餐 ~~ 蔗汁糕、椰汁馬豆糕、冰花白糖糕、芝麻糕、紅豆糕、薩其瑪、炸香蕉、蝦多士、芝士多士

這個下午茶餐就像要將細個時食過的傳統小食糕點一次給大家品嘗一樣，令大家懷緬一番。因為每件糕點都只係得一至兩件，所以有幾款特別喜歡嘅，都另外再 side order，例如蔗汁糕、芝麻糕、炸香蕉、蝦多士同芝士多士

呢一日大家都真係食咗個大滿足！

皇之家大姊小籠包

上海菜一直都係我喜愛嘅中國菜之一，除咗喜愛佢嘅飽點外，還有回鍋肉、酸辣湯、上海年糕都係我喜愛嘅上海食物。

呢晚同大少奶去完迪迪尼玩後，經食友介紹，我哋就去咗佐敦嘅皇之家大姊食上海菜。甫坐下，我哋就要咗回鍋肉炒年糕、小籠包同豆腐粉絲湯。之後見到金黃色嘅炸銀絲卷，又再叫咗一客食。

豆腐粉絲湯比較鹹咗啲，唔知係唔係落多咗味精，不過材料就非常豐富，滿滿的一大碗

回鍋肉炒年糕唔會太油，只係略為唔夠辣，辣多少少會更好

小籠包非常濃郁嘅湯汁，超正之作

銀絲卷一定要食炸，蒸雖然好食，但一定唔及炸嘅好味。外脆內軟嘅銀絲卷，最喜愛先掏空飽心，再食脆脆嘅外皮

今年唯一的大閘蟹宴 @ 八月居

踏入十二月，農曆十一月亦已過去，代表咗食大閘蟹嘅季節亦已完結。今年多咗買大閘蟹回家自煮，少咗出外食。難得今年有同事提意一齊去食大閘蟹宴，我二話不說即時去搜索資料。

過去幾年，曾經去過鴻星同東海，前者三隻大閘蟹太多，更何況唔太愛食蟹公；後者已經食過多年，但每年嘅套餐內容並無什麼分別，實在有啲悶了。搜尋一番後，今次決定去美心集團旗下嘅八月居食大閘蟹宴。

這果套餐絕對抵食，$1,100 四人燕窩。大閘蟹套餐，用恒生信用咭仲有折扣。

劉仱花鵰醉乳鴿 ~~ 淡淡嘅花鵰味配上嫰滑嘅鴿肉，絕對係一道美味冷盤

隔水清蒸大閘蟹 ~~ 大約五両重嘅大閘蟹公，雖然未去到爆膏，但蟹膏仍相當豐富亦甘香

金湯蟹肉燴燕窩 ~~ 蟹肉、燕窩非常豐富，湯味亦香甜濃郁

畔塘五秀炒蝦腰 ~~ 清甜爽脆嘅蓮藕片，帶來一點清爽感覺

風味秋栗雞炆鴨 ~~ 因顧著要食大閘蟹，食這菜時已經放涼，食落已經無初熱時好味。但我仍然吃下幾件，始終栗子、鴨胸都係我喜愛嘅

米湯粗糧泡菜苖 

滋潤薑茶甜湯丸 ~~ 食過大閘蟹後，又點可以無薑茶解解寒涼。

如果這個套餐上菜嘅次序可以稍作改變，上主菜前先上大閘蟹，到差不多品嘗到大閘蟹尾聲時，再上其他主菜會更好。當我們品嘗完大閘蟹後，已上嘅主菜已經放凍，味道亦會變得遜色。

雖然套餐已經有糖水湯丸，但佢嘅紅牌甜品又點可以唔食呢！未開始蟹宴前，已即時留定一個101鮮果拿破崙。這個甜品上枱時，真係有少少無從入手嘅或覺，但難得同事可以將這個拿破崙很平均而又整齊地一分為四，真係要對這個同事寫個“服”字。拿破崙夠鬆脆，亦不太甜，對我這個不太好甜嘅人可以話係剛好嘅味道。