住宅區內的隱蔽食店 @ Sweet 19

當日哥哥話帶我哋去何文田一間好隱蔽嘅餐廳食飯，初初我以為佢講嘅係 The Squirrel Coffee and Kitchen。仲係威係勢咁串佢話已經去過，點知佢帶咗我哋去一間更隱蔽嘅餐廳。一間响一棟私人住宅樓下嘅餐廳，佢隱蔽之處係佢處於何文田嘅內街，前後左右嘅都係一些私人住宅，平時正常都唔會人外人行入呢條街。

哥哥話佢嘅意粉好味，但見到佢有羊鞍，我又忍唔住想食羊鞍。最後當然我都係堅持自己所想，要咗份法式香草烤羊鞍。無乜羶味，只係有少少肥膏，羊鞍亦唔會烤得太乾身。

哥哥一家都分別叫咗唔同款式嘅意粉，鮮三文魚黑白意粉配芥末籽忌廉汁，這個意粉明顯上好 creamy，但難得亦唔會太漏，三文魚亦真係選用咗新鮮三文魚，夾起唔會鬆鬆散散嘅感覺。小魔怪都 KO 哂整碟意粉。

海鮮天使幼麵配龍蝦汁，魷魚、青口、鮮蝦再加埋龍蝦汁，海鮮都幾新鮮，青口亦唔係細細隻、容易食

辣茄茸鮮蝦巴馬火腿燴意粉，唔算太辣。

就咁望都可以見到起碼有四隻蝦，隻蝦都幾大隻，亦好爽口

秋冬孖寶蛇羹與羊腩煲 @ 優意食堂

早上仍是帶著和暖嘅天氣，只係著了一件連身裙加一條頸巾，外套都無帶到。到夜晚放工時，變得了有陣陣寒意，心裡就擔心今晚飯局後，寒意會否更加嚴重。今晚優意食堂這個飯局來得正合時宜，食過蛇羮、羊腩煲，加上花鵰煀雞，再加不斷添飲嘅西班牙紅酒，寒意盡去，還感覺到體內嘅陣陣暖意。

優意食堂 ~ 我會解讀為優閒寫意食堂， 遙望住維港夜景，一個舒適嘅環境，絕對給人優閒寫意嘅感覺。由國福樓改為優意食堂與二星的夜上海屬同一集團，現任大廚陳師傅低調但來頭不少，曾在恆生銀行會所主理，生拆蛇肉功夫極為認真，佢嘅私房太史五蛇羹水準也是城中頂尖之一。

西班牙小何賽特選珍藏火腿 

這個小吃嚟配紅酒就剛好，如果配火腿嘅多士能夠再脆啲就更好喇

第一次品嘗以這種方式烹調葱油鮮製腐竹，清甜爽口

燒汁炒和牛脷，非常腍滑

今晚嘅主角正宗太史蛇羹，湯底濃郁鮮甜。

用料豐富，生拆新鮮蛇肉，每一啖都可以品嘗到一絲絲嘅蛇肉

另一亮點古法雙冬羊腩煲，用咗新鮮黑草羊嘅腩部炆成，並不是仿間一般所用嘅普通羊肉。平舖直擺嘅羊腩，不論係羊腩或佢嘅配料 (冬菇、枝竹、荀、馬蹄) 都炆得非常入味。

陳年花雕煀雞，不是太重嘅花雕味。刻意地揀咗件雞胸肉食，非常嫩滑而不柴

如意冬菇豆腐，很精緻嘅一道菜

蝦絲煎麵，脆扑扑嘅煎麵帶有啖啖嘅蝦味

魚、蝦、蟹炒飯，炒飯炒得粒粒皆乾身

平時好少在外食杏仁茶，因為我會覺得佢哋嘅杏仁味太重，但這個蓮子蛋白杏仁茶，杏仁味剛好，加上蛋白變得更加幼滑

脆皮芝麻煎堆 炸得剛好，亦唔會過油

絕對係一個令人難以忘懷嘅飯局！

又一新歡甜品 @ 甜牙牙

熟識我嘅朋友都知我唔太食甜點，但我會鍾意食一啲湯水類嘅甜品，例如中式糖水、或楊枝金露等等。

但最近就搵到我嘅另一新歡，就係窩夫喇！但係我又唔太好雪糕夾窩夫食，除非佢嘅雪糕係好好味嘅雪糕就另作別論。但市面上好多甜品店提供窩夫都係會跟雪糕球，所以對我嚟講就唔太啱食。最近發現甜牙牙有其中一款窩夫甜品係唔跟雪糕架，攪到我每次去尖沙咀就心思思想去食。





嚟咗呢樹食三次，三次都係揀咗同一款嘅下午茶餐，呢款茶餐有咩咁吸引我？佢就係焦糖菠蘿窩夫三文治配沙律菠蘿，焦糖配撘菠蘿一齊，中和咗個甜味，帶著甜甜酸酸嘅味道，係我理想中嘅甜品，唔太甜嘅甜品就係我杯茶。



這個套餐還跟一杯當日嘅飲品，三次都係同一款青檸檬薏米水，杯內唔太覺有薏米，有淡淡嘅青檸檬味，正好用來清清食甜品後口腔內嘅甜味。



這間一定會再來光顧，下次一定要試下其他款嘅甜品。

特色便當 @ C'est la B

與友人相約嚟呢樹食 lunch，朋友好奇點解我會 order Saigon Box，因為我唔太好食雞肉，而整個 bento 嘅 main dishes 都係雞。朋友問完，我都覺得有啲怪怪，可能因為想食凍檬啦！

個便當加$40就可以多一個湯同蛋糕，咁抵，我哋當然要加啦！先嚟一個我喜歡嘅蘑菇湯，個湯夠熱，好 creamy 仲有好香嘅蘑菇味。



再嚟我嘅 Saigon Box，雞肉嫩渦，賣相係唔錯的。但可能我真係對雞麻麻，食多兩件已經唔係咁想食，同埋個便當實在太多肉喇！個凍檬太碎，失敗咗少少。



甜品要咗個香蕉蛋糕，雖然蛋糕旁加咗焦糖，但一啲都唔過甜，甜度適中。好鍾意佢蛋糕上嘅幾片香蕉乾，甜甜脆脆好好味！



最後嘅咖啡，雖然我鍾意咖啡，但反而覺得係最普通的一個！

以為係拉麵嘅蛋糕

拉麵到底可以做幾多種食法呢？而一間拉麵店除咗食拉麵外，仲可以有咩食呢？如果你係想只食下午茶，你會唔會選擇去拉麵店食呢？

永遠給人創新拉麵概念嘅 Rasupermen，最近就創作咗一款全新嘅拉麵。可唔可以叫佢做拉麵呢？唔叫佢做拉麵咩，但佢又真係酷似一碗拉麵喎？！佢係咩？佢就係拉麵蛋糕！估唔估到呢？

真的好讚歎點解可以諗到將一個蛋糕做到好似一碗拉麵。用嚟盛放蛋糕嘅一個湯鍋嘅器皿，不知內情嘅可能以為係一個小烏冬鍋！

蛋糕似湯模樣嘅係一層薄薄嘅啫喱，而蛋糕係用咗時令嘅粟蓉，蛋糕面仲有各款嘅拉麵甜點，這個蛋糕唔止食得，仲睇得，簡直係賞心悅目！

Le Salon De Thé de Joël Robuchon

Le Salon De Thé de Joël Robuchon 响 IFC 開咗另一分店，當然要嚟朝聖一下啦！全開放式嘅餐廳同置地總店有少許不同，但設計方面仍跟總店相近。



這日相約我女人同佢嘅好姊妹一齊嚟試佢嘅 high tea set，大家都不約而同地無食過早餐或午餐就過嚟，所以除咗 high tea set 外，我哋仲叫咗一啲鹹點食。

Lemon and mascarpone cheese danish ~~ 非常酥脆，帶少許微酸嘅味道，可以為大家開一開胃。



Ham and Comté cheese croissant ~~ 我永遠覺得 ham & cheese 嘅配撘無論襯托落任何一款包點，都一定唔會錯，更何況係來自 Le Salon 嘅牛角包。很濃嘅牛油味加上酥脆嘅牛角包，帶著一份鹹香嘅 ham & cheese，非常好食！



Tuna confit with fresh tomato and taleggio cheese ~~ 我永遠食白麵包，一定要烘底。以前响澳洲時，白麵包永遠都會用嚟整飛碟三文治，學校食嘅亦都係 ham & cheese 飛碟，所以我對這個 toasted sandwich 絕對有一定嘅情義結。就算唔太喜愛係食 tuna，外脆內軟嘅佢，仍然令我覺得好好味。



仲有這個份量十足嘅 tea set ~~ 整個 tea set，大家最喜歡嘅一定係佢嘅 Homemade chocolate，雖然朱古力唔係我嘅至愛，但都好鍾意佢嘅朱古力。朱古力配上雜果仁，好脆亦唔太甜。



我始終都係比較鍾意食鹹點，如果要我揀 tea set 內最喜愛嘅鹹點，反而唔係出名嘅牛角包，而係佢嘅 Earl Grey orange scones。微溫嘅 scones 更突出咗佢嘅牛油味，外脆而內鬆化，唔需要再加任何 cream or jam，已經可以好好味。



當然其他嘅甜點、鹹點亦絕不遜色，以 $380 嘅 tea set for two，絕對值得大家去一試。

熱爆牛角酥 @ Urban Bakery Works

首次接觸 Urban Bakery 係源自佢哋限定推出嘅大閘蟹粉牛角包，自此就對佢嘅牛角包念念不忘。酥脆嘅牛角包，適中嘅牛油香味，不知秒殺咗多少人。

Urban 再下一城，响置地廣場開設首間以 cafe 形式嘅 Urban Bakery Works，在這裡絕對助你解決一日三餐所需。因為佢除咗有牛角包之外，仲有沙律、熱盤、甜品、三文治。而大家亦可選揀放工後嚟 happy hour，因為這間 cafe 領有酒牌，有 sparkling wine、apple cider 等提供。

沙律：Caesar Salad with 24-month Aged Parmesan Cheese，Tuscan Crouton Salad with Basil and Red Wine Vinegrette，仲有 Spanish Corn Salad with Smoked Paprika

因為鍾意食粟米嘅關係，所以特別鍾意 Spanish Corn Salad，好好味

熱盤：Beef Guinness and Mushroom Stew、Roasted Potato with Herbs and Garlic

用黑啤去炆嘅牛肉，好入味；焗薯仔，外脆內軟，絕對值得一試

甜品："What The Fudge" Chocolate Cake, Red Velvet, Macallan 12 ice-cream

What The Fudge 以 Kit-Kat 做蛋糕外圍，蛋糕面上放滿色彩繽紛嘅 M&M，鍾意朱古力嘅你，一定逃唔出佢嘅誘惑

威士忌雪糕，淡淡嘅威士忌味，大家唔需要怕會醉倒街頭。

餐廳嘅設計係以「Bakery is Art」嘅理令出發，而餐廳牆身上的畫係由國際知名嘅雕刻家 VHILS 親自到香港用鑽鑿一下一下咁鑿出嚟

而這家店亦提供了好幾款獨家美食，係其他分別無嘅

8小時鴨脾芥末三文治，雖然用咗8小時嚟烹調，但鴨肉唔會有韌嘅感覺，仲好好味添！只係個人而言，就有少少過鹹嘅味道。

VHILS 牛角酥，由 Urban 與 VHILS 聯成製作，表面質感凹凸不平，同 VHILS 嘅特色牆身極為相似

以後大家去到中環，又可以多一個聚腳點喇！