隱蔽的小店 @ Squirrel Coffee and Kitchen

一個人晚餐，你會選擇食咩？呢一晚又到勝利道，原本諗住去食好味 hot dog 做晚餐，上openrice check 過，佢係開到八點，所以今晚一放工即時趕過，希望唔會摸門釘啦！離遠見到門仍然開著，滿心歡喜諗住今次終於可以食到，點知行近一望，門口掛著一條橫繩，掛著休息牌。又無得食喇，我諗真係要星期六或日過先可以幫襯到！

失望之中，仍然要考慮今晚可以食咩晚餐，突然想起有一間餐廳一直想去試，睇住佢何文田開業到而家，都一直未有呢個機會，今晚終於可以一試喇！ 入到餐廳內先發現原來佢有 dinner set 提供，但因為唔想食得太飽關係，我只係 order 一個意粉同咖啡。



香辣海鮮扁意粉 Spicy Seafood Linguine ~~ 佢嘅辣主要係嚟自黑胡椒，對我嚟講唔算係好 spicy，但就帶出咗整碟意粉嘅味道。意粉嘅韌度適中，唔會過林，而海鮮亦可食出佢嘅鮮味！



Double Espresso ~~ 自從澳門之旅後，開始愛上咗飲 Espresso，無任何其他嘅添加，完全可以飲出咖啡嘅香味！

藝術品般的日本菜 @ Sushi Kado 壽司角

這一日朋友約嚟 Sushi Kado 食晚飯，品嘗到美食與藝術品嘅混合體。一直考慮要唔要出呢篇美食 blog，因為實在有太多不明確嘅菜式名稱，但如果唔分享出嚟，我會覺得好可惜。

先嚟一個海參刺身，同平時熟食嘅海參好唔同，原來生嘅海參係好爽好彈牙，仲要用少少咬勁去食。



這個海膽真的好鮮甜，菜加上咗麻醬變得唔再單調，炸粟米亦都好香口，亦唔覺膩

 

 

一直都只知有左口魚，原來右口都有魚架。。。它叫右口魚！這個右口魚真的片得不能再薄，完全可以睇穿碟面。這個刺身入口非常滑溜甘甜，而佢嘅脂肪有入口即溶嘅感覺，好有脂肪感。



這個秋刀魚刺身好有濃郁嘅魚香，入口即溶



這個並不是普通嘅長腳蟹腳，而係加咗海膽响面一齊炮制而成，非常鮮甜美味



連普普通通嘅薑片，都切得如斯考究，一絲不苛！

 

這個鮑魚大根煮，爽口鮮甜



這裡嘅海膽係由北海島直送，仲係用北海島嘅海水包裝運送到港，可以令你更能品嘗到海膽嘅鮮味。

 

食完右口魚，當然唔少得左口魚啦，仲要再加上佢嘅魚肝一齊食。左口魚嘅魚油比右口魚多，所以食落就更加甘香。



原隻蟹肉加蟹膏，真的無話可說

 

這個玉子同平時食嘅好唔同，佢並無冷藏過，再經過烤烘而成，更見美味。

拉麵特集 @ Rasupermen

拉麵可以有幾多種做法呢？湯麵、沾麵、冷麵，仲有無？我就只係諗到呢幾款，你又有無諗到其他食法呢？呢一日我就品嘗到另一種食法喇，就係漢堡式拉麵！

漢堡飽大家就食得多喇，咁有無試過食拉麵漢堡呢？咁又有無試過用手攞住個麵嚟食？呢日我就用手攞住呢個拉麵漢堡食喇！Rasupermen 最新推出嘅拉麵漢堡用上厚厚嘅美國牛肉，脆脆嘅拉麵再加上 Teriyaki 汁，為拉麵帶來一片新天地！

 



櫻花蝦鹽味拉麵 ~~ 軟韌適中嘅拉麵配上香濃嘅鹽味雞湯底，再加上新鮮炸上嘅櫻花蝦，令我不能停止地完成整碗麵同湯底

 

豚骨豆乳拉麵 ~~ 看著這個滑不溜手嘅蛋，你忍心叫下它嘛？我忍心，因為我完全感覺到佢呼喚緊我，叫我食咗佢落肚，感受一下佢嘅幼滑程度！但唔好意思，這個蛋唔係要你咁樣食落肚，佢係要同湯混和一齊食架！當蛋黃遇上豆乳湯，就會融為一體，變得更加實在。而這個豚肩肉，食落有點似豬頸肉，但它比豬頸肉少脂肪，所以吃起來無好膩嘅感覺，亦比較爽口！



蔥花醬油豚肉伴麵 ~~ 第一次試食沾麵，沾麵真係有其意思，真係沾一沾就可以食。如果將麵放响湯內太久(久嘅定義係10至30秒內)，麵就會吸盡湯嘅精華，就會覺得太鹹。但如果只係沾一沾，大約兩秒左右，麵嘅味道就剛剛好。這就是沾麵嘅奇妙之處！

 

長腳蟹柳配北海道甜粟米拉麵 ~~ 第一次品嘗到這個拉麵，就係响 raIRONmen 嘅飯局內，這個麵令我一試難忘。好開心可以响 Rasupermen 與佢重遇，重拾當日那份感覺。這碗拉麵溶合咗我最喜愛嘅蟹柳，超甜粟米，再加上這個香濃湯底。。。我已無話可說！

小魔怪生日宴 @ 龍皇

每年小魔怪生日，都會有唔同方式同佢慶祝，差不多隔年就會幫佢攪生日會，請佢朋友仔一齊慶祝。今年小魔怪爸爸問佢想去邊到開生日，家姐話有得去日本旅行已經好開心，唔使再開生日會，只要叫朋友、屋企人一齊食飯就得。估唔到小小年紀佢已經咁懂事。

最後小魔怪爸爸就龍皇為佢一對寶貝女慶祝生日，好可惜我太遲訂位，已經唔可以book到房，只好坐出大廳啦！龍皇食過兩間，一間新蒲崗，一間銅鑼灣，新蒲崗應該算係較新一間,。雖然大家係同一品牌食店，但始終佢廚師唔同，水準點都會有差別，不論服務或食物水準，我都比較鍾意新蒲崗分店多！



不論係邊類型嘅中式飯宴，乳豬仔可以話係特定嘅菜式之一，但唔係每一間都可以做得咁好食。龍皇絕對係將呢隻乳豬仔燒得皮薄又脆，肉又鬆嫩，亦唔會有油膩嘅感覺，真係會食完一件又一件架！

 

紅燒蟹肉翅湯底味濃，滿滿嘅蟹肉，香口鮮味！



冶味炒海參 ~~ 不論係瓜或海參都非常爽脆、入味！



砵酒蝦球 ~~ 個賣相好似唔係太得，但味道還可以，並唔油膩！

 

今次小魔怪嘅爸爸好闊綽，不論小朋友或大人都有一隻四頭澳洲鮮鮑。這個鮑魚煮得好腍、非常入味，個汁香甜濃郁！

 

食過一輪飽肚嘅菜式後，要嚟番味清清哋嘅竹笙泡時蔬，清清腸胃！



清蒸金花尾好滑，又鮮味



不論係邊個部位嘅魚露雞都非常嫩滑，仲有好香嘅魚露味



五穀豐登荷葉飯，個飯好爽，好香嘅荷葉味



因為掛住唱生日歌，影蛋糕，呢碟甜品椰香桂花糕就影唔到相喇！我好欣賞呢碟桂花糕，因為佢嘅桂花味唔會太重，可以食到好清嘅桂花味道！

山打根美饌 @ Cafe Kool

大家有無聽過山打根呢個地方？你哋又知唔知响邊？個名我就聽過喇，但就只知係响馬來西亞。原來山打根係沙巴嘅第二大城市。因為响十九世紀初期，有唔少廣東省嘅華人經香港移居山打根，所以山打根亦曾有「小香港」之稱。

响嚟緊嘅一個星期至二十七號，Kowloon Shangri-La 嘅 Cafe Kool 邀請咗三位客席廚師於晚市自助餐炮製一系列道地山打根美食。

 

本身 Cafe Kool 嘅自助餐食物已經係包羅萬有，今次仲加多咗山打根嘅美食，更加係錦上添花，簡直係食到不能停止。

山打根嘅頭盤包括香蕉花沙拉、海燕窩沙拉、生蝦沙拉、蝦卷配馬來西亞芒果、銀魚柳、花生魷魚炒通菜、膠魚苦瓜沙拉等。海燕窩同一般燕窩嘅口感好唔同，海燕窩食落係好爽，佢比一般燕窩係更加有益。除咗山打根嘅頭盤外，仲有其他嘅頭盤供應，我最欣賞就係盛載好嘅一樽樽嘅沙律，佢仲有10款唔同嘅沙律俾我選擇。

 

 

 

馬來西亞食物唔少得嘅當然仲有大家熟識嘅肉骨茶，同埋唔同嘅麵食，包括喇沙，山打根麵同雞麵。肉骨茶唔太重嘅藥材味，好啱香港人嘅口味。今次揀咗黃酒醉雞湯麵線，好香好濃嘅酒味。如果你揀黃酒醉雞湯，你可以考慮唔落任何餸，只要麵同菜已經可以，因為佢嘅湯係連埋雞肉一齊上，如果再加餸料就會太多喇！食友們就食咗喇沙，佢哋都話好好味，大家都不防一試呀！



除咗有平時食到嘅冷盤海鮮、刺身、壽司同埋其他熱食外，仲有山打根嘅美食酸咖喱魚頭、軟殼蟹、炒牛油蝦、酸梅醬牛尾、咖喱雞、菠蘿咖喱等等。酸梅醬牛尾非常入味，而佢哋嘅咖喱亦不會太辣，一般人都可以接受到嘅辣度。第一次食咖喱整嘅菠蘿，酸酸辣辣，仲好 juicy，好好味！

 

 



甜品亦都係琳瑯滿目，目不腵給，今晚最驚喜之作嘅甜品就係榴槤忌廉卷。就算你唔好食榴槤都可以一試這個榴槤卷，佢嘅榴槤味唔太重，亦不會太甜。提意大家如果想食這個榴槤卷，第一輪甜品就要去攞嚟食啦！因為呢款甜品真係好搶手，今晚食到後期已經沽清喇！