2013 東京遊 Day 2

今日可以用先甜後苦嚟形容，一早醒來見到窗外已經全光，以為一家人都瞓過龍。正想衝去沖涼嘅時候，望一望個鐘，原來六點都未到，但東京嘅天色看似已經係七點多。

 

梳洗完畢就落餐廳食早餐，酒店有兩間餐廳俾我哋選擇。其實兩間餐廳嘅食物係一樣，只係環境、觀景唔同。既然係咁，難得我哋又可以一早落到嚟食早餐，當然揀間觀景較好嘅餐廳啦！



沿路入去就坐嘅時候已經開始視察啲食物，已經睇中咗幾款食物想食。

 

 



攞咗幾款心水食物，呢樹嘅奄列有多款餡料可以選擇，我比較貪心揀哂我鍾意嘅餡料，結果係餡料太多，隻蛋癡唔埋。雖然如此，但我覺得好好味，我一向都唔太熱愛食蛋，但今次因為個奄列太好味，我完全將佢 KO 咗。

 

除咗上碟嘅食物，我仲飲咗麵鼓湯，再加上那些日本前菜。麵鼓湯係自己加昆布同白饅頭。個麵鼓湯一啲都唔會過咸，日本前菜更加係醒胃啦！

 

之後再嚟咗個冰上冷麵。。。今次個早餐，我覺得係超滿足。



甜品過後，苦茶送上。。。

半個多小小嘅車程，我哋到逹咗橫濱八景島。。。我可以話，如果你已經嚟過呢到嘅水族館，你可以唔需要去墾丁嘅水族館。如果你認為墾丁水族館內嘅魚類生物已經夠營養的話，咁橫濱呢樹一定營養超標。墾丁嘅水族館絕對比橫濱嘅大，但橫濱嘅魚類係比墾丁嘅超超大。

 

 

之後再去咗摸海豚、同企鵝影相。最想摸到海豚嘅小朋友一個都摸唔到，但反而所有大朋友都摸過哂倏白海豚。無辦法小朋友未夠高，手又未夠長，就算我哋大人點幫手將佢哋抱起，始終都係摸唔到。



因為 over run 嘅關係，我哋除消咗去橫濱拉麵館嘅行程，只係去日清杯麵館。但好可惜自制杯麵嘅門劵已經賣哂，最後只可以在這裡買些杯麵。。。暗然離去。



之後我哋就打道回台場行街，好多謝三位爺爺、爸爸帶咗五位小朋友去 Legoland，令到我哋一班女仕們可以安心行街。

台場無太多大嘅 shopping mall，我哋亦只係行咗兩個，買嘅都係食物同藥房物品。我想買嘅非食物手信可以話一件都買唔到，都唔知點返去見江東父老。

今日大家都想早啲返酒店休息，所以選擇响台場隨便食食做晚餐，最後決定咗食拉麵。。。我這一碗拉麵可以用無乜特別嚟形容。

 

明晚我決定放棄迪士尼，要去 outlet shopping，希望可以搵到想買嘅嘢啦。。。希望大家保祐我。

2013 東京遊 Day 1

暫時响7月尾先決定嘅東京遊，一行14人今日終於成功出發喇！因為決定得太遲，好多想訂嘅酒店或餐廳都已經訂唔到，令到所計劃嘅行程一改再改。原本由全程 JR、電車，最後一個星期先決定租車，仲要响出發前嘅星期五先 confirm 到兩架車。

到逹機場，辦好租車手續，到逹酒店已經係差不多六點喇！因為訂唔到新宿附近嘅酒店，所以今次入住响台場嘅 Nikko Tokyo Hotel。入到酒店lobby，酒店職員就捧着一籃嘅得意嘅太陽眼鏡給小朋友選擇。



我哋訂嘅係海景房，面對住七彩繽紛嘅彩虹橋，一班小朋友都大叫起來。台場這個地方雖然比較離原宿那些購物熱點較遠，但慶幸酒店離台場嘅大型商場都較接近，希望聽日可以早些完成行程，返嚟買個夠本啦。

 

 

上到酒店房洗個面後，就急不及待要出新宿消費，但可惜出到新宿已經差不多八點，所以大型商場已經關門，我哋只好選擇去新宿街頭行逛一番，最後我哋就去咗藥房買咗個滿載而歸。



我哋原本訂咗九點半食晚飯，但大家都已經好肚餓，同埋已經無乜嘢可以比我哋行，最後我哋決定提早去餐廳食晚飯。



去過東京旅行嘅朋友都應該認識呢間餐廳，佢嘅 Shabu Shabu & Yakiniku 放題係超抵食。最平嘅一款放題係7000yen 咋。。。仲要係 all you can eat in 2 hours。

 

呢碟有牛舌、里脊肉、五花肉同雞肉，佢嘅牛真的無得好講，林到有點好似食鵝肝咁，入口即溶嘅感覺。



Shabu Shabu 嘅黑毛和牛亦係一絕，連我阿嫂唔食牛嘅，都會食上兩件。蟹肉亦係非常鮮味。

 

除咗 Shabu Shabu 有蟹外，Yakiniku 一樣有蟹食，仲要係帝王蟹，仲有扇貝同蝦。大家可能認為烤過嘅海鮮會無咁鮮味，咁樣諗就錯。烤食其實一樣好好味，仍然可以食到海鮮嘅鮮甜味，個人覺得仲好食過 Shabu Shabu。



我哋另外都叫咗麵同蔬菜籃，食咁多肉點可以唔食番啲菜，但原來佢裡面唔單止有蔬菜，仲有兩件日本年糕架，我有幸食到一件，非常煙煙韌韌。

 

這個蟹粥不得不提，唔好睇落好似水汪汪，無乜料咁，但佢係非常鮮甜，好有蟹味，大家嚟到一定要食呀！



最後大人每人一個雪糕球，小朋友就每人一枝雪條。



仲有一樣好抵嘅，就係我哋今次五位小朋友，由七歲以下嘅全部免費架。

呢一餐每一位團友都攬住個肚腩走，個個都話超好食。有一個小朋友平時唔多食嘢嘅，今晚係比平時食多咗八倍架，因為真係好好味。

撐枱腳 @ Hyatt Regency 凱悅軒

我嘅家族好似都遺傳咗鍾意食嘅嗜好，先係我公公，我從未見過佢，但聽我媽咪平時講關於我公公嘅點滴，可以知道佢係一個咀刁，識飲識食嘅人。

而我兩個舅父曾經或現在都同飲食有不解之緣。我大舅父曾經响酒樓工作超過廿多年，而細舅父現在更是酒樓嘅大廚。兩位都係識飲識食之人，而我媽咪亦都遺傳咗公公鍾意食嘅嚐好。

而到我呢代，不論我阿哥或我都係鍾意食，最近屋企安排去旅行，我哥哥要求嘅酒店唔係要有咩設備或什麼舒適嘅環境，而係要求要有好味嘅早餐。

到我一對姪女小魔怪，最鍾意嘅都係食。每次佢哋見到我嘅食物相，都會埋怨我唔帶佢哋一齊去食，成日都話嬲咗我。

响我小姪女未出世之前，每到假期我都會同我媽咪去搵好嘢食。大姪女出咗世，我哋就帶埋佢一齊去搵好嘢食。小姪女出世後就少咗呢啲機會，所以開始受到兩方嘅埋怨。

呢一日適逢可以响凱悅軒訂到枱，就同媽咪兩個去撐枱腳啦。。。原本都想帶埋一對小魔怪去，可惜佢哋都要去上堂，只好等下次再有機會先再帶佢哋去啦！但今次撐枱腳，都要同佢哋講大話，唔敢話係去飲茶。如果俾佢哋知道我哋有得飲茶，又唔帶佢哋去，一定嘈到拆天。

之前已經聽過好多人話凱悅軒嘅嘢好食，知道佢哋有一個點心套餐，有點心、飯、麵、粥、甜品任揀，就帶嫲嫲去試吓啦！

 

嚟得凱悅軒，無理由唔點佢哋出名嘅蜜汁叉燒啦，斬舊大叉燒。。。肥瘦適中，軟硬剛剛好，入哂味



細個唔知咩叫海蜇，只知佢叫橡根。每次出街叫餸時，就會同媽咪講要食橡根。到大個時，知道佢係叫海蜇，雖然佢外形有啲似橡根，但一定唔會好似橡根咁韌，仲要係一味開胃小食。



一碗老火靚湯，鱆魚蓮藕湯。。。湯絕對唔怕多，只係怕味精湯，又或者係一碗水到唔水嘅所為湯。但呢到嘅絕對係老火靚湯，我真係好想問佢要多碗飲。



媽咪每次飲茶都會鍾意叫嘅點心。。。叉燒麭。。。對我嚟講，這個麭麭嘅 size 剛剛好，唔好太大，食一個麭就可以食飽。



鮮蝦春卷、鵝肝咸水角，鵝肝咸水角絕對唔係得個名架，咬開一啖仔已經見到好大粒鵝肝响裡面。

 

媽咪見到有麻蓉麭又話要食，佢話已經唔多酒樓有麻蓉麭食，同埋一定要熱辣辣食先好味。但我就對麻蓉唔多好，所以只點咗一個比媽咪自己品嚐。咁樣食點心就係最好，可以只 order 自己份量，又唔使要迫其他人一齊食，或者要自己一個食哂。媽咪個話個麭好熱辣辣、麻蓉好香，佢好 like 呀！



百花釀魚肚，蝦膠絕對唔會實甩甩，魚肚又夠爽，值得推介！



之後再嚟多個上海粗炒，真係唔明點解兩個人可以食咁多嘢？仲要係清哂。。。



食完點心，當然唔少得嘅甜品啦！原本只係諗住每人一碗蓮子紅棗茶，但侍應哥哥提意我哋叫埋豆紅糕試下，因為都唔係太大件。所以我哋好貪心咁，兩樣都叫齊。蓮子紅棗茶絕對係足料，好明顯係落咗好多紅棗去煲，好濃嘅紅棗。