天氣不穩定或太炎熱嘅日子，午餐我通常都係叫外賣壽司食，皆因我公司身處嘅位置係。。。落雨就淋死，曬就曬死，如無必要留响公司安全啲。但無理由因為呢個理由，而無美食介紹比大家架。
我係好鍾意去澳門周圍覓食嘅人，既然而家係暑假，我哋就走出香港，介紹响澳門 Sheraton Hotel 裡嘅其中一間餐廳比大家。澳門食意大利菜嘅餐廳唔多，而呢間係其中一間。既然係身處酒店內嘅餐廳，環境已經係無需質疑，佢嘅意大利菜更加係喜出望外，驚喜萬分。
呢個 set menu 係以大廚個名為名 - 阿弗雷多‧羅素套餐 Alfredo Russo Set Menu
大家估唔估到係咩？見到嘅時候，我以為係一粒牛丸放咗响生蠔殼上面，但食落。。。OMG。。。原來係將蠔打溶，再將佢製成這樣的一粒生蠔。這是我第一次咁樣去品嚐生蠔，絕對無腥味，但就 full of oyster taste，真係好好味！
名廚阿弗雷多的生蠔 alfredo's oyster
下一個驚喜之作，呢個又似咩？我覺得似香港太空館、又或者係半雪糕球，你哋認為呢？當這個太空館分開後，裡面係滿滿嘅蕃茄沙律。
呢個特制水牛芝士蕃茄沙律絕對又係另一誠意之作，佢不單外形吸引，連味道都絕對不差。咁大球嘅芝士，混合咗蕃茄一齊，絕對係天作之合。
因為我唔好食魚嘅關係，所以廚師特別為我將粉紅三文魚伴月桂西芹汁，轉咗呢味蘑菇粟米塊，真係好多謝廚師為我嘅安排，仲要係我超鍾意食蘑菇囉！
呢味檸檬燻意大利肉雲吞，望落無咩特別，但其實雲吞裡面嘅肉好特別，除咗有白肉外。。。仲有少少嘅兔肉。其實唔講嘅話，你係唔會食得出兔肉同白肉嘅分別。
因為唔食野生多寶魚伴洋蔥嘅關係，所以我享用咗呢份鴨肉。呢隻鴨一定係好肥，你睇佢有幾厚肉，雖然隻鴨好肥，但佢嘅肉好林，連個 sauce 一齊超好味！
一粒粒嘅粉紅胡椒焗羊肩配馬鈴薯忌廉，完全無羊嘅騷味。雖然個羊肩係全熟，但一啲都唔 un，仲好好味添！
跟住呢個不得了呀，見到佢即時感覺到一份少女甜蜜幸福嘅感覺。水蜜桃湯配杏仁酒忌廉不但外表幸福，食落仲更加幸福，非常透心涼，新鮮嘅白桃配埋湯梗直係滿心/ 口幸福。
最後再嚟一杯至愛咖啡作為完結。
最最最後為大家介紹一位有型靚仔，佢係邊個？哈哈哈。。。咪就係大廚阿弗雷多‧羅素囉，係唔係好型呢？
